කවදා හෝ අභ්‍යවකාශගත වීමට කුඩා කල සිට තිබූ කැමැත්තත් දැඩි උනන්දුවත් මත එම ක්ෂේත්‍රයට වැඩි අවධානයක් යොමු කළෙමි. එහි ප්‍රතිඵලයක් වශයෙන් වැඩිදුර අධ්‍යාපනය ලැබීමට ඇමරිකාවේ නාසා ආයතනයට ඇතුළත්වීමට මට වාසනාව උදාවිය. වසර කිහිපයක පුහුණුවකින් පසු අභ්‍යවකාශගතවීමට වරම් මට ලැබිණි. ඒ ප්ලූටෝ ග්‍රහයා වෙතට යි.
 මා සමග ඇමරිකානු ජාතික ගගනගාමීහු තිදෙනෙක් හා ඉන්දියානු    ජාතික ගගනගාමියෙක් ගමනට එක්වූහ. මනා පළපුරැද්දක් ඇති ගගනගාමීහු දෙදෙනෙක් යානයේ කාර්මික කටයුතුවල යෙදෙති. අප සැම ආහාර සඳහා ලබා ගත්තේ ප්‍රෝටීන් හා විටමින් අඩංගු පෙත්තකි. දැන් අප පෘථිවියෙන් බොහෝ ඈතට ගොස් සිටින බව දැනිණි.
 මෙසේ මාස කිහිපයක් අපි පෘථිවියෙන් ඈත්වී සිටියෙමු. අප බලාපොරොත්තු වූ සහ මුළු ලොව ම බලා සිටි මොහොත උදා විය. කක්ෂගත වූ අප යානය ප්ලූටෝ ග්‍රහයා වටා මඳ දුරක් ගමන් කර ගොඩ බැස්සවීය. පැය භාගයක පමණ ක්‍රියාවලියකින් පසු අපි ප්ලුටෝ ග්‍රහයා මතට පා තැබුවෙමු. තොරතුරැ සටහන් කරගත්තෙමු.අපි අපේ රටවල ජාතික කොඩි එහි සිටෙව්වෙමු. 
 ඒ මොහොතේ ඇමරිකානු පුරවැසියකු වූ මගේ හොඳම මිතුරාගේ කටහඬ ශ්‍රවණය විය.  එහෙත් ඔහු මා සමග ගමනට එක්වූයේ නැත. ඒ සමගම ඔහු මා අල්ලා සෙලවීය. එවිට මා නින්දෙන් අවදි විය. මා මෙතෙක් වේලා දුටුවේ සිහිනයක් බව මට වැටහිණි. මා තවම නාසා ආයතනයේ ඉගෙනුම ලබන ශිෂ්‍යයෙකි.
    එහෙත් කෙදිනක හෝ මගේ මව්බිමේ ධජය ප්ලුටෝ ග්‍රහයාගේ මත පමණක් නොව සැම ග්‍රහයකු මත ම පිහිටුවන්නෙමි. 

විත්මි සෙනේසා මායාදුන්නේ
9 ශ්‍රේණිය,
බප/ගම්/ගෝතමි කනිෂ්ඨ විද්‍යාලය.