ත්‍රිපිටක සංරක්‍ෂණ මණ්ඩලයේ සාමාජිකයන් වෙත පත්වීම් ලිපි පිළිගැන්වීම ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ඊයේ (31දා) ජනාධිපති කාර්යාලයේදී සිදු කෙරිණි.

මල්වතු පාර්ශ්වයේ අනුනායක පූජ්‍ය නියංගොඩ විජිතසිරි, අස්ගිරි පාර්ශ්වයේ අනුනායක පූජ්‍ය ආණමඩුවේ ධම්මදස්සි, සෝමාවති රජමහා විහාරාධිපති පූජ්‍ය පහමුණේ සුමංගල, පූජ්‍ය මැදගම ධම්මානන්ද, පූජ්‍ය ත්‍රිකුණාමලයේ ආනන්ද යන නායක ස්වාමීන් වහන්සේලාගේ මූලිකත්වයෙන් ගිහිපැවිදි සාමාජිකයන් 43 දෙනෙකුගෙන් සමන්විත කණ්ඩායමකින් යුතුව ජනාධිපතිවරයා විසින් මෙම ත්‍රිපිටක සංරක්‍ෂණ මණ්ඩලය පත්කරනු ලැබීය.

ථේරවාදී බුදුදහම ඇතුළත් ත්‍රිපිටකය ජාතික උරුමයක් කිරීමට ජනාධිපතිවරයා පසුගියදා පියවර ගත් අතර , ඉන් නොනැවති ථේරවාදී ත්‍රිපිටකය ලෝක උරුමයක් ලෙස සංරක්‍ෂණය කිරීමට අදාළ වැඩපිළිවෙළද සකස් කර තිබේ.

එමෙන්ම ජනාධිපතිවරයා විසින් පත්කරන ලද ත්‍රිපිටක සංරක්‍ෂණ මණ්ඩලයේ අනුමැතියෙන් තොරව ඉදිරියේදී ත්‍රිපිටකය නැවත මුද්‍රණය හෝ සංස්කරණය සපුරා තහනම් වනු ඇත.