කොළඹ සෙරන්ඩිබ් විදුහලේ සිසූහු රොබෝටික්ස් තරගාවලියේදි ලෝකයම දිනති

තායිලන්තයේ පැවති ජාත්‍යන්තර රොබෝටික්ස් තරගාවලියක් වන International Creativity and Innovation Awards තරගාවලියට සිය නිර්මාණ ඉදිරිපත් කළ කොළඹ - 04 , බුර්හානි සෙරෙන්ඩිබ් විද්‍යාලයේ සිසුන් 06 දෙනෙකු  ප්ලැටිනම් සහ රන් සම්මාන දිනා ගැනීමට සමත් වී තිබූ අතර ඔවුන් 04/29 දින රාත්‍රී කටුනායක ගුවන් තොටුපොළ වෙත පැමිණියහ .

මෙම තරගාවලිය තායිලන්තයේ බැංකොක් නුවර ඉකුත් 04/26 දින සිට 04/28 දින දක්වා ලෝකයේ රටවල් 24 කණ්ඩායම් 400 ක් නියෝජනය කරමින් තරගකරුවන් 1,000 ක් පමණ සිය   නිර්මාණ ඉදිරිපත් කරමින් සහභාගී වී සිටියහ .

මෙම විද්‍යාලයේ සිසුන් තිදෙනකු මෙම තරගාවලිය සදහා ලැව් ගිනි හදුනා ගෙන එහි පිහිටීම කඩිනමින් දැනුම් දෙන    ( Wild Fire Ditector ) Blaze Alert යන්ත්‍රයක් නිෂ්පාදන කර ඉදිරිපත් කර තිබූ අතර , ඒ සදහා මෙම තරගාවලියේ ප්ලැටිනම් සම්මානය හිමි වී තිබේ .

එසේම මෙම නිර්මාණය ඉදිරිපත් කළ සිසුන් තිදෙනාට කාම්බෝජයේ පැරගොන් ජාත්‍යන්තර විශ්ව විද්‍යාලයේ 100% නොමිලේ හදෑරිය හැකි අධ්‍යාපනික ශිෂ්‍යත්ව තුනක් හිමි වී තිබේ .

එමෙන්ම මෙම විද්‍යාලයේ තවත් සිසුන් තිදෙනකු සාගරය වෙත ගොස් එහි අපද්‍රව්‍ය හදුනා ගෙන ඉවත් කිරීමේ ( Ocean Sweeper ) යන්ත්‍රයක් මෙම තරගාවලිය සදහා ඉදිරිපත් කර තිබූ අතර ඒ සදහා රන් සම්මානය හිමි වී තිබේ .

ඊට අමතරව මෙම නිර්මාණය සදහා Most Interesting Solution යන සම්මානය ද හිමි වී තිබේ .

මෙසේ සම්මාන දිනා ගත් සිසුන් පිරිස එම විද්‍යාලයේ විදුහල්පති ආචාර්ය සබීර් මහතා සහ එම විද්‍යාලයේ පරිගණක තාක්ෂණය උගන්වන මුර්තාසා ගුරු මහතා ද සමග 04/29 දින රාත්‍රී 10.00 තායිලන්තයේ බැංකොක් නුවර සිට එයාර් ඒෂියා ගුවන් සේවයේ එෆ්.ඩී.- 140 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ අතර ඔවුන් පිළිගැනීම සදහා මෙම සිසුන්ගේ දෙමාපියන් විශාල පිරිසක් ද ගුවන් තොටුපොළ වෙත පැමිණ සිටියහ .