ඇමරිකානු හිටපු සුපිරි පාපැදි ශූර ලාන්ස් ආම්ස්ට්‍රෝන්ග් සිය ක්‍රීඩා දිවිය පිළිබද පාපොච්චාරණයක් සිදු කොට ඇත. එහිදී ඔහු පවසා ඇත්තේ තමන් වසර 21ක පමණ කාලයේ පටන් තහනම් උත්තේජක ගැනිමට හුරුවී සිටි බවයි.

ඊ.එස්.පී.එන් වෙබ් අඩවිය සමගින් පැවැති සම්මුඛ සාකච්ඡාවකදී හෙතෙම මේ බව පැවසීය. එමෙන්ම එය තමන් මුහුණදුන් පිළිකා තත්ත්වයටද හේතුවූ බව හෙතෙම මෙහිදී සදහන් කළේය.

48 හැවිරිදි ආම්ස්ට්‍රෝන්ග් ලොව ඉහළතම පාපැදි සවාරිය වන ප්‍රංශ පාපැදි සවාරිය පිට පිට හත්වරක් (1999-2004) දිනා ගැනීමට සමත්වූයේ එවැනි දස්කමක් දැක්වූ පළමු ක්‍රීඩකයා වෙමිනි. 1996 වර්ෂයේදී වෘෂණ කෝෂ පිළිකාවකට ලක්වූ ආම්ස්ට්‍රෝන්ග් 1998 වර්ෂයෙන් පසුව නැවතත් පිටියට පිවිසි අතර ඔහුගේ සියලුම ප්‍රංශ පාපැදි සවාරියන් ඉන් අනතුරුව ජයග්‍රහණය කිරිම ඔහුගේ ජයග්‍රහණවල වටිනාකම වැඩි කිරීමට හේතුවිය.

අනතුරුව සිදු කරන ලද පරීක්ෂණවලින් අනතුරුව 2013 වර්ෂයේදී ආම්ස්ට්‍රෝන්ග් තහනම් උත්තේජක ලබා ගත් බව ඇමරිකානු තහනම් උත්තේජක පිළිබඳ ඒජන්සිය තහවුරු කළේය. ඒ හේතුවෙන් 1998 වර්ෂයේ පටන් ආම්ස්ට්‍රෝන්ග් ලබාගත් සියළුම ජයග්‍රහණ (ප්‍රංශ පාපැදි ජයග්‍රහණය ඇතුලුව) අවලංගු කිරීමට අන්තර්ජාතික පාපැදි සංගමය තීරණය කළේය.