මධ්‍යම කඳුකරයේ බටහිර බෑවුම් ප‍්‍රදේශවලට තවදුරටත් කඩින් කඩ අධික වර්ෂාව ඇද හැලීම හේතුවෙන් ඉහළ කොත්මලේ ජලාශයේ වාන් දොරටුවක් හා කැනියොන් ජලාශයේ වාන් දොරටු දෙකක් විවෘත කර තිබේ. විමලසුරේන්ද්‍ර ජලාශය වාන් දැමීමට ආරම්භ වී ඇතැයි වාර්තා වේ. ජල පෝෂක ප‍්‍රදේශවලට අධික වර්ෂාව ලැබුණහොත් එම ජලාශයේ වාන් දොරටු ස්වයංකි‍්‍රයව විවෘත වන නිසා ජලාශ වේල්ලට පහළින් සිටින පිරිස්වලට සැලකිලිමත් වන්නැයි ඉහළ කොත්මලේ ජලාශයේ ඉංජිනේරුවෝ ඉල්ලති. ලක්‍ෂපාන ජලාශයේ විවෘත කර තිබු වාන් දොරටු මේ වන විට වසා දමා ඇති අතර තවදුරටත් වැසි ලැබුණහොත් එම ජලාශයේ වාන් දොරටු විවෘත කිරිමට සිදුවන බව විදුලි බලමණ්ඩලය පවසයි.

විමලසුරේන්ද්‍ර ජලාශය ද වාන් දැමීමට පටන්ගෙන ඇති නිසා කැලණි ගඟේ ජලමට්ටම තරමක්  ඉහළ යා හැකි බව ද සඳහන් වේ.
තද වර්ෂාවත් සමග කාසල්රී ජලාශයට පහළින් ඔස්බොන් වත්ත ප්‍රදේශයේ පස්කන්ද කඩාවැටීමෙන් හැටන් නෝටන්බ්‍රිජ් ප්‍රධාන මාර්ගයේ ගමනා ගමනයද ඇන හිට ඇතැයි ද නෝටන්බ්‍රිජ් මස්කෙළිය මාර්ගයට ටේබර්ටන් ප්‍රදේශයේ ගසක් කඩා වැටීමෙන් එම මාර්ගය ගමනා ගමණය ද ඇන හිට  ඇතැයිද  පොලිසිය පවසයි.

මේ අතර නෙළුව ප්‍රදේශයට සහ ඉහල ජලපෝෂක ප්‍රදේශවලට ඇද හැලුණු අධික වැසි හේතුවෙන් අද (15) අලුයම සිට ගිං ගඟ ආශ්‍රිත පහත්බිම් රැසක් යටවී ඇතැයි ගිංගග බාර වාරීමාර්ග ඉංජිනේරු අමරජීව ලියනගේ මහතා ලංකාදීපයට පවසා තිබේ.