එංගලන්තයට එරෙහිව කොළඹ ආර් ප්‍රේමදාස ක්‍රීඩාංගණයේදී අද (23 වැනිදා) පැවැති  පස්වැනි සහ අවසන් එක්දින තරගයේදී ලකුණු 219 ක දැවැන්ත ජයක් වාර්තා කිරීමට ශ්‍රී ලංකා පිල සමත්විය. මෙම තරගයටත් වර්ෂාවෙන් බාධා පැමිණි අතර ඩක්වර්ත් ලුවිස් න්‍යාය මත තරගයේ ජයග්‍රහණය ශ්‍රී ලංකා පිලට හිමිවිය. කෙසේ වෙතත් තරග 5 කින් සමන්විත එක්දින තරගාවලියේ ජය 3-1 ක් ලෙසින් එංගලන්තයට හිමිවිය.

පළමුවෙන් පන්දුවට පහර දුන් ශ්‍රී ලංකා කණ්ඩායම ඕවර 50 ක් අවසානයේදී කඩුලු 6 ක් දැවී ලකුණු 366 ක් ලබාගත්තේය. එකම පිතිකරුවකු හෝ ශතකයක් ලබා නොගත් කණ්ඩායමක් විසින් එක්දින තරගයකදී ලබාගත් තුන්වැනි වැඩිම ලකුණු සංඛ්‍යාව වන්නේද මෙයයි. ඡායාරූපය- චතුර එස් කොඩිකාර

ලකුණු 367 ක ඉලක්කයක් කරා යමින් සිටි එංගලන්ත පිලේ කඩුලු 9 ක් ලකුණු 132 කට ඇද වැටුණු අතර ඒ වන විට සම්පූර්ණ කර තිබුණේ ඕවර 26.1 ක් පමණි. ඩක්වර්ත් - ලුවිස් ඉලක්කය අනුව තරගය සමකිරීමට නම් එංගලන්තය ඒ වන විට ලකුණු 351 ක් ලබා සිටිය යුතුව තිබිණ