රන් පදක්කම් දෙකක්, රිදී පදක්කමක් හා ලෝකඩ පදක්කම් දෙකක් සමගින් මෙවර කැරම් ලෝක ශූරතාව සාර්ථකව නිමාකිරීමට ශ්‍රී ලංකා (හත්වැනි) කැරම් කණ්ඩායම සමත් විය.

තරගාවලියේදී ශ්‍රී ලංකාවට තවත් රන් පදක්කමක් හිමිකර දීමට ස්විස් ලීග් ඉසව්ව නියෝජනය කළ චමිල් කුරේ සමත් වූ අතර එහි ලෝකඩ පදක්කම නිශාන්ත ප්‍රනාන්දු විසින් දිනාගන්නා ලදී.

ශ්‍රීලංකාව මීට පෙර තරගාවලියේ ප්‍රධාන තරග ඉසව්ව වූ කණ්ඩායම් ඉසව්වේ පිරිමි කණ්ඩායම් ශූරතාව හිමි කරගත් අතර කාන්තා කණ්ඩායම විසින් එහි කණ්ඩායම් ඉසව්වේ අනුශූරතාව (රිදී පදක්කම) හිමිකර ගන්නා ලදී.

මේ අතර තරගාවලියේ දී ශ්‍රී ලංකාව පිරිමි හා කාන්තා යුගළ ඉසව්වන්හිදී ලෝකඩ පදක්කම් හිමිකර ගත්තේය.කෙසේ වෙතත් තරගාවලියේදී බොහෝදෙනා අවධානයෙන් සිටි නිශාන්ත ප්‍රනාන්දුගේ ලෝක ශූරතාව මෙවර ඔහුට අහිමිවීම ශ්‍රී ලංකාවට අවාසියක් වූ සිදුවීමක් වූ අතර ඒකල තරග ඉසව්වන් හිදී සැලකිය යුතු දක්ෂතා දැක්වීමට ශ්‍රී ලංකා ක්‍රීඩක ක්‍රීඩිකාවෝ අපොහොසත් වූහ.

නිශාන්ත ප්‍රනාන්දු එහිදී 05 වැනි ස්ථානය හිමි කරගත් අතර ශ්‍රී ලංකා ක්‍රීඩකයෙකු එම ඉසව්වේ හිමි කරගත් ඉහළම ස්ථානය එය විය. ඔහුට අමතරව චමිල් කුරේ මෙහි 07 වැනි ස්ථානය හිමිකර ගත් අතර මොහොමඩ් හිල්මි (08) හා මොහොමඩ් ෂෙරිෆ්ඩීන් (11) ඔහුට පසුපස ස්ථාන හිමිකර ගත්හ.

කාන්තා ඒකල අංශයේ ශ්‍රී ලංකාව වෙනුවෙන් උපරිම දක්ෂතා දැක්වීමට එහි 4 වැනි ස්ථානය හිමි කරගත් චලනි ලක්මාලි සමත් වූ අතර ජෝශප් රොෂිටා (5), යසිකා රාහුබද්ධ (05) හා අරෝෂා වික්‍රමසිංහ (08) ශ්‍රී ලංකාව වෙනුවෙන් එහි ඉතිරි ස්ථාන හිමිකර ගත්හ.

එක්සත් රාජධානියේ බර්මින්හැම් හිදී පසුගියදා (07) ආරම්භ වූ තරගාවලිය පසුගියදා (11දා) අවසන් වූ අතර ශ්‍රී ලංකා කණ්ඩායම අද (14දා) දිවයිනට පැමිණීමට නියමිතය.